第１日 ∼ 北へ
 Day 1 - Go to the North

晨早喺機場會合泰利女友, 吃過早餐後check in, 乘坐JAL嘅航班往東京成田空港轉機往札幌。 無事到達成田空港, 航班已有點延誤, 原本一小時多的轉機時間只剩不足45分鐘, 碰巧又有另一班由美國來之旅客抵步等入境, 有喺成田空港入境經驗嘅朋友都知道喺如此情形下要等幾耐, 泰利兩口子可否趕及往札幌嘅航班呢？


跟空港人員交涉希望通融先替我們辦理但係始終雞同鴨講, 唯有厚住面皮同排頭位嘅外籍人士表明處境立場, 外籍人士笑笑口話「No problem」, 咁就打尖成功啦(逼不得已咋...)！
怱忙趕上往札幌之航班, 正尋找自己座位嘅時候竟然巧遇中學同學, 世界真係細(之後嘅事更加證明呢點...)！ 寒暄一番後泰利已經體力不繼, 瞬間睡著了... 不知不覺就已經到達新千歲空港。

攞返行李後上咗Package包埋嘅Limo往札幌市中心進發。 喺巴士上面忽然聽到泰利女友同人哋傾計, 咦？ 佢識日文嘅咩？ 原來同佢傾計嘅女士係剛旅遊回來嘅教師, 而佢哋係用英文交談嘅, 臨落車嗰位教師仲話出面好凍而送咗包暖手嘅東東俾泰利女友, 真係多謝關心！

因為路面結冰巴士慢駛之故, 到達京王プラサホテル札幌嘅時候已經差不多晚上１１點喇... 攪掂Check in放低行李喺房之後立即出動去搵嘢食, 估唔到一踏入升降機竟然又撞見於航機上偶遇嘅中學同學, 有冇咁啱呀！
由於泰利實在太疲累, 最後兩口子只係到便利店... 冇錯！ 係去Lawson買杯麵做宵夜。 吃過杯麵怱怱梳洗後上床就寢, 就此結束了疲累又沉悶的旅程第一天。 おやすみ．．．